Y cysylltiadau rhwng pwysau a thrawma
Gall adegau anodd a phrofiadau bywyd anodd fod yn drawmatig ac effeithio ar eich siwrnai pwysau.
Gall fod yn bwysig treulio amser yn ystyried yr ystod o ffactorau a all effeithio ar ein pwysau yn dilyn trawma. Gall hefyd eich helpu i dderbyn nad chi sydd ar fai am fyw ag anawsterau rheoli pwysau.
Efallai gwnewch chi adnabod ffactorau sydd wedi dylanwadu ar sut rydych chi o amgylch bwyd. Er enghraifft, efallai ei bod yn anoddach i chi wrthod bwydydd arbennig pan fydd gennych feddyliau a theimladau anodd. Mae’n gyffredin i bobl sydd wedi cael profiad o drawma droi at fwydydd â lefelau braster a siwgr uwch, yn rhannol oherwydd bod y rhain yn gwneud i chi deimlo’n well (oherwydd gall bwyta dynnu sylw a darparu rhyddhad dros dro o’ch meddyliau a’ch teimladau), ac yn rhannol oherwydd y newidiadau hormonaidd sy’n digwydd, sy’n effeithio ar ein gallu i deimlo’n llwglyd neu’n llawn, gan ei gwneud yn anodd colli pwysau.
Gall ein profiad o drawma effeithio ar ein cwsg hefyd, a all darfu ar ein gallu i golli pwysau oherwydd newidiadau hormonaidd.
Stigma pwysau
Efallai eich bod wedi colli pwysau o'r blaen ac wedi cael sylwadau cadarnhaol gan bobl o’ch cwmpas sydd wedi newid eich meddyliau a’ch teimladau am bwysau:
“Pan fyddaf i’n denau, rwy’n cael fy nerbyn a fy hoffi”
“Pan fyddaf i dros fy mwysau, rwy’n teimlo fy mod wedi fy ngwrthod a bod neb yn fy hoffi”
Neu efallai eich bod wedi cael sylw a oedd yn anodd i chi ymdrin ag ef, a arweiniodd at ail-fagu’r pwysau y gwnaethoch ei golli i osgoi’r sylw hwn.
Naill ffordd neu’r llall, gall sylwadau gan eraill gadw’r cylch creulon hwn o wahaniaethu ar sail pwysau i droi, a all yn ei dro arwain at golli ac adennill pwysau fel io-io.
Hunanwerth
Efallai nad ydych yn eich blaenoriaethu chi a’ch anghenion bob amser, e.e. gwneud mwy o amser i ofalu am a chefnogi eraill, efallai ei bod hi’n amser i chi flaenoriaethu eich hun a’r gofal a’r gefnogaeth sydd eu hangen arnoch chi ar yr adeg hon.
Gall trawma ddylanwadu ar golli pwysau yn iach
Mae’n arbennig o bwysig sylweddoli y gall trawma ddylanwadu ar allu person i golli pwysau.
Efallai mai’r cam cyntaf i chi yw:
- cydnabod bod trawma yn achosi straen a’i fod y tu hwnt i’ch rheolaeth
- cydnabod nad chi sydd ar fai am eich pwysau, gan ei fod yn gallu bod yn ymateb i drawma
- nodi’r cymorth a all helpu a chymryd y cam nesaf i gael gafael ar y cymorth hwn
Am y tro, gallai hyn ymwneud â sut mae trawama wedi effeithio ar eich bywyd a’ch iechyd meddwl a lles, yn hytrach na chanolbwyntio ar golli pwysau.
Gall cael y cymorth a’r gefnogaeth iawn eich helpu i reoli’ch pwysau yn y tymor hir.
Parhau â'ch siwrnai
Ewch i'r dudalen nesaf sef Cyfeirio i wasanaethau cymorth a chefnogaeth ar unwaith i barhau â'ch siwrnai.
